不少歷史建築都經保育變成新地標,而一向多工廠的荃灣,最近就有間舊紗廠進行保育計劃,變身成文化藝術館。南豐紗廠保留了工廠外貌,變成六廠紡織文化藝術館(CHAT 六廠),更舉行「盛夏手作:來建紡織村」活動,有展覽、每日工作坊及週末限定工作坊、藝術家講堂、電影放映、分享會及互動體驗活動。好啱周末同朋友仔一齊去玩!
紗廠大堂環境廣闊,雖然加入了新元素,但大堂當中仍保留了不少舊紗廠的物件,仲附有歷史簡介,可以一邊欣賞一邊上返堂歷史課!
為期3星期的「盛夏手作:來建紡織村」活動,位於CHAT六廠的2樓,邀請到共十多位本地及海外藝術家參與,有展覽欣賞外,仲有得親身體驗落手一齊整!
當中最特別的展覽,就是由日本藝術家田口行弘創作的紡織龍。
火龍由回收布及竹架組成,全場35米,每一個部分都做得相當仔細。
觀眾內仲有得一齊落手參與製作火龍,繼續織出龍身,費用全免,有興趣可以試試!
另一邊「紡織村廣場」展覽,就有得欣賞到本地紡織歷史,大型機器都有展出。
仲有得walk-in參加《刺繡花園工作坊》,用回收布整出小刺繡。
場內仲有設計特別的刺繡教學提供,新手都不用怕!
另有紀念品工作坊,可以體驗剪裁、車縫及木版印刷,自製出Cushion或布袋。
在走廊上仲有多個由本地藝術團體參展的「紡織村屋」,各個都有互動體驗活動及週末限定工作坊舉行。當中最吸睛的就是巨人染的「藍染洞穴」。
走入洞穴仲有得動手體驗藍染過程,周末仲有藍染手織籃工作坊。
以回收布製成的巨大布條小屋一樣特別,軟綿綿布座椅仲真係坐得!一樣可以落手體驗整捲布條的過程。
呢間村屋可以認識到剩食染料的製作,仲可以試試為布料上色。
以白雲和草地等大自然設計的村屋,就以復古民間手藝紡線為主,大家同樣可以體驗製作過程。
各個村屋都有「週末限定工作坊」,包括:天然染料布藝、親子拼布、織織木凳、紡紗 x 編織小品、藍染手織籃等等。
南豐紗廠變身文化手作館!藍染洞穴/紡織布龍/6大工作坊
日期:2018.7.29 - 8.19
時間:上午11:00 至 晚上7:00
地點:香港荃灣白田壩街45 號南豐紗廠, 六廠紡織文化藝術館(CHAT六廠)
費用:免費